Menu
Nieuwsoverzicht

Uddel, groeit en GROEIT

17 maart 2015

784x gelezen
23

UDDEL   –   Wie de leste tied deur Uddel fietst of met de auto ziet overal veul bedrijvigheid. Links en rechts komm’n de huuz’n a’s paddestoelen uut de grond. De nieuwbouw a’n de Uddelsekampweg is zo goed a’s klaor. Van de letste bouw hebb’n ze eerste nieuwe bewoeners de sleutel al ekreg’n. Vanaf de Uddelsekampweg hei je een mooi zicht op de bejaordenwoningen die iets naor achter staon. Het ziet d’r allemaol mooi uut. Een hele verbetering v’rgeleken met die ‘ouwe nieuwbouw’. Van binnen o’k, mooie ruume huuz’n.

’t Plan Aardhuus, doar begint de eerste fase o’k mooi op te schieten. De eerste huuz’n word’n binnenkort o’k op’elevert. Op papier zag het plan d’r al mooi uut, m’r in warkelijkheid is dat o’k zo. Verschillende types huuz’n bouwen ze doar. D’r was veul belangstelling veur. Binnenkort start’n ze met de verkoop van fase twee. En zo goan ze deur tot ’t hele plan van zo’n honderd huuz’n klaor is.

D’r worden noen veul huuz’n bouwt, m’r d’r is een tied eweest dat d’r niks kon a’s we in Uddel huuz’n vreug’n in Apeldoorn. De politieke wiend die toen vanuut Apeldoorn over Uddel wei’de was koud en kil. In de jaor’n negentig van de veurige eeuw ging’n ze Apeldoorn zelfs zo veer, dat a’s we in Uddel huuz’n wou’n, dan most’n we met z’n all’n zo’n half miljoen ophoest’n veur honderddartig huuz’n. Uddels Belang, de spreekbuis van de Uddelse bevolking, ging zoa’s altied veurop in de strijd, en dat doen ze nog steeds. De toenmalige veurzitter, Peter van Rhee, weigerde om met de pet rond te gaon. ’t Is nooit van de grond ‘ekomm’n. In de loop van de jaoren is men in Apeldoorn o’k wel gaon zien dat we in Uddel huuz’n nodig hadd’n en dat ze in Apeldoorn daor verantwoordelijk veur bin. Die koude en kille wiend is veraandert in een zachte veurjaorsachtige wiend. M’r we moet’n in Uddel niet denken dat we d’r noen bin. ’t Is goed um veuruut te blieven kieken, naor de toekomst. Will’n we oons dorp levendig houd’n dan moet’n we bliev’n zorgen dat de jonger’n in Uddel kunn’n bliev’n woen’n. Uddel is een strijdbare dorpsgemeenschap en dat moet zo bliev’n.

Background

Mis nooit meer het nieuws uit Uddel!

Volg ons op social media of schrijf je in voor onze nieuwsbrief en blijf op de hoogte van de laatste ontwikkelingen en evenementen in en om Uddel.

IN JE INBOX